Ish-presidenti amerikan Donald Trump është qëlluar me armë gjatë një tubimi elektoral në Pensilvani.Ngjarja e rëndë që tronditi Amerikën ndodhi teksa Trump fliste para mbështetësve të tij për garën elektorale të nëntorit 2024, kur Trump kërkon një tjetër mandat si president dhe përballet me Joe Biden.
Sipas mediave amerikane, Donald Trump ka qenë duke folur në podium kur u qëllua me armë. Plumbi e kapi në vesh dhe faqe, duke e lënë të gjakosur. Më pas skena i la vendin kaosit.
Agjentët e Shërbimit Sekret mbuluan menjëherë ish-Presidentin dhe e larguan nga vendngjarja. Trump ishte i ndërgjegjshëm dhe shëndeti i tij nuk paraqiste rrezik.Autori i sulmit u vra më pas nga Shërbimi Sekret.
Mediat raportojnë se gjatë tentativës për vrasjen e Donald Trump, autori vrau një qytetar në tubim dhe plagosi 2 të tjerë, të cilët janë në spital në gjendje të rëndë për jetën.
FBI ka konfirmuar emrin e personit, i cili dyshohet që qëlloi mbi ish-Presidentin Donald Trump. Bëhet fjalë për 20-vjeçarin Thomas Matthew Crooks.
Në një deklaratë, hetuesit federalë thanë: “FBI-ja ka identifikuar Thomas Matthew Crooks, 20 vjeç, nga Bethel Park, Pensilvani, si subjekt i përfshirë në atentatin e ish-presidentit Donald Trump më 13 korrik, në Butler, Pensilvani.
“Ky mbetet një hetim aktiv dhe në vazhdim”.Personi i armatosur u “neutralizua” menjëherë nga Shërbimi Sekret”, tha shefi i komunikimeve Anthony Guglielmi.
Të dhënat e votuesve të Pensilvanisë listonin një Thomas Matthew Crooks me të njëjtën adresë dhe datëlindje si një republikan i regjistruar, raporton rrjeti partner amerikan i Sky NBC News
